Urban poor komite gi-aksyonan ang hangyo sa konseho sa Macasandig

HUMAN sa gihimong inspection sa mga kawani sa City Engineer’s Office kabahin sa reklamo sa konseho sa Barangay Macasandig sa gi-ingong illegal structures nga gitukod daplin sa dalan ug atbang sa Macasandig Elementary School nasuta nga ang maong lote nga gitukoran sa mga sari-sari store iya kini sa syudad sa Cagayan de Oro.

Kini ang gipadangat nga investigation/verification report ni OIC City Engineer Jenito Asequia atol sa panag-tigom sa komite sa urban and rural poor and housing development ni Konsehal Edgar Cabanlas ni-adtong milabayng semana.

Sumala ni konsehal Cabanlas nga dapiton sa sunod tigom ang nasangpit nga mga apektadong pamilya aron ipasabot kanila ang estado sa ilang nahimutangan ug sa ingon nga matabangan usab sila sa gobernong local nga mapahilona kini sa insaktong dapit nga dili na matugaw ang ilang pagpamaligya.

Mahinumduman nga gihanyo kini sa konseho sa Barangay Macasandig nga mapahawa tungod kay nakasulod kini sa road lot nga diin nakapagamay sa dalan sa maong dapit.