Suan misupak sa dinali-daling pag-aprobar sa ₱9.55-b 2027 budget

HUGOT nga misupak si Minority Floor Leader Konsehal Agapito "Aga" Suan, uban sa duha ka sakop sa minoriya nga sila si Konsehal Yvy Emano ug Konsehal Imee Moreno, sa dinali-daling pag-aprobar sa ₱9.55-bilyon nga proposed 2027 Executive Budget sa syudad atol sa gipahigayon nga budget hearing sa Committee-of-the-Whole niadtong Oktubre 15, 2026.

“Ang akong pagsupak dili tungod kay gusto nako babagan ang kalamboan sa syudad, kon dili aron masiguro nga ang matag piso sa katawhan moagi sa lawom nga diskusyon sa komite ug adunay transparency ug saktong proseso sa pagrepaso sa pundo sa katawhan”, pahayag ni Suan luyo sa iyang pagboto og "No."

Matod ni Suan nga ang dinali-dali nga deliberasyon nga milungtad lamang og duha ka oras ug tunga dili igo aron makuting mabusisi ang matag alokasyon sa binilyon nga budget. Ang dako nga pundo kinahanglan hatagan og saktong panahon sa pagsusi aron masiguro nga kini base sa reyalidad, sumpay sa konsehal.

Ang kwarta sa lungsod kinahanglan nga panalipdan, ug ang saktong diskusyon sulod sa komite maoy yawe aron masiguro nga walay mausik nga piso sa mga Kagay-anong magbubuhis, ug magamit kini sa husto, makiangayon, ug transparent nga pamaagi, dugang pamahayag ni Konsehal Suan. (RNQ/SP)