Suan misugyot sa dugang pagtuki sa aplikasyon sa Agua de Oro Resources

"Ang akong pagsupak dili sa intensyon nga babagan ang pagpalambo sa suplay sa tubig sa Siyudad kon dili alang sa dugang pagtuki niini tungod kay ang bisan unsang proyekto nga naglambigit sa usa ka hinungdanon nga serbisyo publiko kinahanglan una nga moagi sa mas lawom nga serye nga diskusyon sama sa mga miting sa komite sa konseho”.

Kini ang gibutyag ni Konsehal Aga Suan, minority floor leader, sa sesyon niadtong Lunes nga gidumala ni Bise Mayor Bebot Rodriguez samtang gituki ang resolusyon nga nagpadayag sa walay pagsupak sa aplikasyon sa Agua de Oro Resources, Inc., sa pag-finance, pagpalambo, pagtukod, pag-operate ug pagmentinar sa Level III Water Supply, Distribution, Connection, Metering and System Modernization Program sa dakbayan.

Gipasabot sa konsehal nga daghan pa untang mga pangutana nga angay matubag diha sa committee level, ilabina kay atol sa miaging tigom sa komite sa public utilities, ang representante sa Agua de Oro mihisgot man og partnership ug ang mobalor nga P10 bilyones nga proyekto.

Gisugyot ni Suan nga gikinahanglan pa gayod unta ang dugang pagtuki niini sa dili pa ipahayag sa konseho ang resolusyon sa walay pagsupak aron mahibal-an ang mga saktong detalye bahin sa maong lakang. (RNQ/SP)