Suan malaumon problema sa basura masolusyonan

GIKAHINGAWA ni Konsehal Aga Suan, minority floor leader sa Konseho nga hangtud karong panahona, abri pa alang sa bidding alang sa pagkolekta sa basura sa syudad.

Dugtong sa konsehal nga medyo naulahi na gyud gamay sa pagpangita puli sa miaging kontraktor sa pagkolekta sa basura.

Unta unom ka bulan sa dili pa mohupas ang kontrata, gisugdan na ang pagpangdawat sa bidding, ug sayo pa nangayo na og letter of intent aron mapreparahan sa kompanya kay daghan man ang rekisitos ug usa na niini kinahanglan adunay daghang garbage trucks ug personahe ang kontraktor subay sa gisita nga gabayan ug lagda sa syudad.

Dili pud pwede nga magpataka og kuha unya wala man diay nila nasunod ang mga kinahanglanon sa kontraktor, pamahayag ni Suan.

Niini, naglaum si Suan nga makakuha na gyud unta sa daling panahon ang syudad og kontraktor aron masiguro nga makolekta sa saktong oras matag-adlaw ang basura sa kabarangayan sa dakbayan. (RNQ/SP)