Reklamo sa tubig sa Macabalan giaksyonan sa Public U

TALIWALA sa gihatag nga katin-awan ni Engr. Kim Perido, head sa engineering and planning section sa Cagayan de Oro Water District (COWD), gusto gihapong masuta ni konsehal Teodulfo Lao Jr., chairman sa komite sa public utilities, ang insaktong hinungdan sa hugaw nga agas sa tubig sa Barangay Macabalan, ning syudad.

Sa tigom sa komite kagahapon, gipahayag ni Perido nga adunay mga posibilidad nga hugaw ang agas sa tubig kun adunay ipahigayon nga repair sa linya ang mga kawani sa COWD.

Niini, nagtuo si Lao nga posibleng tipik kini sa hinungdan apan gusto niyang ipailawom pa sa makuting pagsusi ang maong panghitabo aron matugkad ang tukmang hinungdan sa hinay sa supply sa tubig ingon man ang hugaw nga agas.

Dugang pa ni Lao nga dili lang ang Macabalan ang adunay mulo sa kahinay sa supply sa tubig apan daghan pang mga barangay ang nagpadangat sa ilang susamang nasinati-an.

Nunot niini nanghinaot si Lao nga mapalambo sa Cagayan de Oro Water District ang ilang serbisyo sa tubig sa katawhan sa dakbayan.