65 ka tuig nga serbisyo sa APOO gidayeg ni Konsehal Suan

“USA ka testamento sa gugma ug malasakit sa sektor sa agrikultura."

Kini ang pamahayag ni Konsehal Aga Suan, minority floor leader sa Konseho, isip pahalipay ngadto sa City Agricultural Productivity Operations Office (APOO) sa ilang pagsaulog sa ika-65 nga founding anniversary niadtong Biyernes, Oktubre 16, 2026.

Ubos sa tema nga “Rooted in Service, Growing with Purpose: Celebrating Our Legacy, Honoring Our People, and Growing Together for a Sustainable Future,” gidayeg ni Suan ang kalig-on sa maong buhatan nga karon gipamunoan ni City Agriculturist Engr. Bernie A. Daba Jr. diha sa pag-atubang sa mga hagit sa modernong pagpanguma.

Gawas sa unom ka dekada nga legasiya, gipasidunggan usab sa konsehal ang gihimo sa APOO nga pagpang-apod-apod sa mga modernong kagamitan sama sa solar-powered water pumps, HDPE pipes, plastic drums, ube plantlets, ug 11,000 ka mushroom fruiting bags aron mapalambo ang kita sa mga mag-uuma.

Gipasalig usab sa konsehal ang iyang padayon nga suporta sa mga balaodnon nga maghatag og dugang proteksyon ug kalamboan sa maong sector ug sa mga local food producers sa dakbayan. (RNQ/SP)