Programa alang sa panglawas suportado ni Konsehal Cabaring

GITINGUHA ni City Indigenous Peoples Mandatory Representative (IPMR) Konsehal Datu Roberto P. Cabaring nga madungog ug maapil ang interes sa sektor sa mga Lumad diha sa mga programa sa panglawas.

Kini  human ang konsehal personal nga mitambong sa binulang tigom sa Local Health Board (LHB) sa miaging semana didto  sa Deluxe Hotel.

Ang presensya ni Konsehal Cabaring nagdala sa tingog sa komunidad sa mga Lumad (IPs) sa Cagayan de Oro, ilabi na sa hisgotanan sa pagpalambo sa mga serbisyong panglawas.

Mahinumdoman nga gipahigayon ang maong tigom subay sa imbitasyon sa Office of the City Administrator, sa hangyo ni Acting City Health Officer III Dr. Rachel D. Dilla, aron plantsahon ang mga prayoridad ug epektibong pagplano sa serbisyo medikal sa siyudad.

Kini nga paningkamot tali sa mga magbabalaod sa siyudad ug sa mga medical experts maoy dalan aron masiguro nga ang mga palisiya sa panglawas epektibo ug daling mabati sa matag Kagay-anon. (JRG/SP)