Permanenteng barangay hall sa pipila ka lugar gisugyot ni Suan

“[The] barangay is the basic unit of our local government and with quality infrastructure it means quality and efficient services to their constituents”.

Kini ang unod sa taho ni Konsehal Aga Suan, minority floor leader sa konseho, atol sa sesyon sa Lunes nga gidumala ni Bise Mayor Bebot Rodriguez.

Sa iyang pagbisita sa pipila ka barangay sa syudad, nabantayan sa konsehal nga walay permanenteng barangay hall ang ubang barangay ug nag-abang lang sa gamayng luna.

Bisan tuod ang luna nagtugot kanila sa paghimo sa mga batakang administratibong gimbuhaton, makita gihapon nga kulang sa luna ug mga kahinguhaan, sa ingon nakababag sa ilang abilidad sa paghatag sa de kalidad nga serbisyo ngadto sa ilang katawhan.

Nagpadayag ang barangay og kahinam sa pag-angkon og luna alang sa ilang barangay hall apan wala silay  kapanguhaan.

Alayon niini, si Bise Mayor Bebot Rodriguez mibutyag nga dakong problema nga walay lote nga mahimo pang tukoran ug kung naa man sobra na kamahal kay sentro man sa syudad.

Ang maong taho giduso ni Bise Mayor Bebot Rodriguez ngadto sa komite sa barangay affairs ni Konsehal Marlo Tabac aron mahisgutan ang prayoridad sa barangay ug ang tukmang aksyon niini. (RNQ/SP)