Pagtukod og skateboarding facility gihangyo sa OYDC

GILANTAW nga makatukod og dedicated public skateboarding facility ang dakbayan.

Kini human ng Oro Youth Development Council (OYDC) mipasaka og resolusyon nga naghangyo sa konseho ubos ni Bise Mayor Bebot Rodriguez alang sa paggahin og igong pundo alang  sa  pag-establisar sa maong fasilidad aron magamit sa kabatan-onan diha sa ilang pagpromote sa kahimsog sa lawas, disiplina, pagkamamugnaon, kahimsog sa pangisip, ug pakiglambigit  sa katilingban.

Sa maong resolusyon gipasabot usab nga  nagkadaghan na ang mga skateboarders ingon man mga extreme sports enthusiasts apan nagpabilin nga walay permanente ug luwas nga facility ang syudad alang sa skateboarding activities.

Niini, si Konsehal Kenneth John Sacala, chairman sa komite sa sports and youth development, gipaabot nga mopatawag og tigom alang sa maong katuyoan  aron hiniusang hisgotan ang maong butang uban sa representante sa Office of the City Youth Development Officer, administrador sa dakbayan, city planning and development coordinator, local finance committee ug city budget officer. (JRG/SP)