Pagpatuman sa Project ACE padayong gitun-an

PADAYONG gitun-an sa komite sa social services ni konsehal Girlie Balaba ang mga lakang nga mapalapdan ang tinguha pagproteher sa katungod sa kabataan.


Kini human si mayor Oscar Moreno rekomendar ngadto sa konseho sa pagpalabang sa gikinahanglang ordinansa aron maghatag kaniya sa katungod pagpirma sa Memorandum of Agreement (MoA) tali sa World Vision Development Foundation Inc. (MVDFI) alang sa pagpatuman sa kolaborasyon pag-promote sa Project Against Child Exploitation (ACE) dinhi sa syudad.


Gibutyag nga ang maong panagtambayayong magseguro nga mapatuman ang mga gikinahanglang lakang aron masumpo ug mapakgang ang bisan unsang matang sa child labor ug online sexual exploitation ingon man mga kalapasan sa acceptable conditions sa panarbaho.


Dugang pa, giingon nga mapalig-on usab ang panagtambayayong sa mga opisyal sa kagamhanang lokal ug uban pang stakeholders dinha sa pagpahigayon og knowledge, attitude ug practice (KAP) study ug pagpasiugda sa mga training ug seminar mapakgang ang child exploitation.


Sa maong paagi mapalambo usab ang nasugdan nang mga programa ug proyekto sa City Council for the Protection of Children (CCPC) dinha sa pagtubag sa tanang matang sa child exploitation, child labor ug online sexual exploitation.