Pagkolekta sa bag-ong mining fees walay basehan -Abbu

SI Konsehal Joey Abbu, Jr., chairman sa komite sa labor and employment, hugot nga mihangyo sa City Local Environment and Natural Resources Office (CLENRO) sa paghatag og kopya sa collection report sugod sa tuig 2020 kalabot sa ilang gipatuman nga mining fees nga wala nagbase sa 2015 Local Revenue Code sa dakbayan.

Kini ang unod sa special report ni Abbu atol sa sesyon niadtong Lunes nga gidumala ni City Vice Mayor Bebot Rodriguez.

Matod sa konsehal nga sa miaging tigom sa komite sa ways and means ubos ni Konsehal George Goking diin gihisgutan ang DILG memorandum kalabot sa mga bayronon nga gipahamtang sa kagamhanan kabahin sa mga aktibidad sa pagmina sa syudad, gikonpirma sa representante sa CLENRO nga sukad pa sa tuig 2020 ang ilang pagpangolekta sa bag-ong rate.

Sa iyang pagpangutana kung unsa ang gibasehan sa pagkolekta sa maong bayronon, ang tubag sa CLENRO nga sa tuig 2020 nagsumite sila sa konseho og proposed rates alang sa mining ug uban pang environmental fees kay adunay lakang amendahan ang 2015 City Revenue Code.

Apan wala nahinayon ang maong lakang tungod sa pandemic o naabtan na usab sa sunod nga konseho.

Gipasabot ni Abbu nga tungod kay wala man nahinayon ang pag-amendar sa 2015 revenue code, ang ilang gisugyot nga rate dili mahimong maoy pagabasehan sa pagkolekta sa maong bayronon.

Niini, kusganong mihangyo ang konsehal sa buhatan sa CLENRO sa report mahitungod sa ilang nakolekta gikan sa mining operators sugod tuig 2020 aron tan-awon pilay sobra sa nakolekta nga pwede e-refund o e-tax credit.

Ang maong taho giduso ni Bise Mayor Rodriguez ngadto sa komite sa ways and means ni Konsehal George Goking alang sa tukmang pagtuon ug rekomendasyon. (RNQuiblat/SP/Photo by OVM)