Paghikling sa demolisyon dihas Carmen gihangyo sa Konseho

SA ilang sesyon niadtong Lunes nga gidumala ni Bise Mayor Bebot Rodriguez, hiniusang gipalabang sa Konseho sa dakbayan ang resolusyon nga naghangyo ni Presiding Judge Giovanni Alfred H. Navarro sa Regional Trial Court-Branch 18, nga i-hold in abeyance sulod sa unom (6) ka bulan ang pagpatuman sa Writ of Demolition diha sa Carmen, ning syudad.

Kini may kalabotan sa Civil Case No. R-92-355, “Segundo D. Flores, et. al (Plaintiffs), versus Cristobal Canios, et. al (Defendants)”, para sa Accion Publiciana”, sa Dadiangason o nailhan nga Carmen Hill, sakop sa Barangay Carmen, ning Siyudad.

Ang maong aksyon gihimo sa Konseho samtang ang dakbayan, pinaagi sa City Housing and Urban Development Department (CHUDD), magpahigayon og socio-economic survey sa mga apektadong pamilya alang sa pagpangandam sa ilang posibleng relokasyon ug sa pagkonsiderar sa edukasyon sa ilang mga kabataan.

Ang resolusyon alang sa maong katuyoan gipangamahanan ni Konsehal Edgar Cabanlas, majority floor leader sa konseho. (RNQ/SP)