Pagdahili sa riverbank, pagbaha diha sa Ilaya, Gusa gipangitaan og sulbad

PADAYONG  gipaningkamotan sa komite sa environment and natural resources sa konseho sa dakbayan ubos ni Konsehal Enrico Salcedo nga mapangitaan og hingpit nga solusyon ang problema sa pagdahili sa riverbank ug pagbaha nga gakasinati matag karon ug unya sa mga residente sa Sekyup Ilaya, Purok 3, Barangay Gusa.

Atol sa tigom sa komite dili pa lang dugay, girekomendar sa City Engineering Office ug Department of Public Works and Highways ang  pagbutang  og  sand bag isip dinalian nga solusyon sa maong problema.

Apan kini hugot nga gisupak ni Renante Namocatcat, usa sa mga apektadong residente sa dapit. Matod ni Namocatcat  nga diha na siya nagdako  sa maong dapit  ug iyang nakita  nga dili ang pagpahimutang  sa sand bag ang makasolbad sa ilang sitwasyon.

Mahinumduman nga una nang gihangyo ni  Namocatcat  ang  pagpahigayon og dredging o pagkalot sa barado nga agianan sa tubig aron mobalik ang normal nga agos ug sa  ingon  malikayan ang pag-awas sa tubig nga nakaapekto kanila ug sa ilang kabtangan.

Gumikan sa managlahing opinyon, gipahayag ni Konsehal Salcedo nga gikinahanglan una sa komite ang opisyal nga rekomendasyon gikan sa Cave Management ug sa Environmental Management Bureau.

Tungod niini, gidapit sa komite ang  maong mga ahensya sa pagtambong sa ilang sunod nga tigom aron plantsahon ang maong isyu.

Sa iyang bahin, nagpadayag sa iyang dakong kabalaka si Gusa Barangay Kapitan Marlo Tabac ug mihangyo nga kinahanglan kining matan-aw ug maatiman sa labing daling panahon tungod kay apektado na usab ang supply sa tubig sa maong dapit.

Matod sa kapitan nga nahugno na ang usa sa duha ka water tank nga maoy tinubdan sa tubig sa mga residente, ug usa nalang ka tangke ang nabilin nga nagserbisyo kanila karon. (JRG/SP)