Pag-establisar og feed mill sa Brgy Gusa giduso ngadto sa komite sa pamalaod

GIDUSO  ni Konsehal Enrico Salcedo, chairman sa komite sa environment and natural resources, ngadto sa komite sa pamalaod ug reglamento ubos ni Konsehal Edgar Cabanlas ang hangyo sa RAC Commercial Corporation alang sa usa ka resolusyon nga nagpadayag sa walay pagsupak (no objection) sa ilang laraw nga pag-operate og usa ka compact feed mill sa Barangay Gusa.Gipasalig sa representante sa RAC Commercial Corporation nga luwas ang ilang operasyon ug dili kini makaapekto sa panglawas sa mga lumulupyo tungod kay kontrolado ang abog niini.Gipaluyohan usab ni Konsehal ug Kapitan Marlo Tabac ang maong proyekto.

Siya midugang nga nakapahigayon nag silag public hearing alang sa maong katuyoan.

Matod ni Tabac, dako kini og tabang sa barangay tungod kay makahatag kini og dugang kinitaan sa dapit ug makahatag og kahigayonan sa trabaho sa mga residente sa Gusa.

Apan ang City Planning and Development Office ug City Local Environment and Natural Resources Office nagkanayon nga ang Gusa nasulod sa Medium Density Commercial Zone (C2), samtang ang maong matang sa industriya nakasulod sa Industrial 1 ug 2 classification, hinungdan nga matod nila, dili kini haom sa ilang gitumbok nga lokasyon subay sa kasamtangang zoning ordinance.

Gawas niini, gipahibalo usab sa CLENRO nga nanginahanglan ang proyekto og Environmental Compliance Certificate  gikan sa Environmental Management Bureau.

Tungod kay ang isyu sa zoning classification ra man ang nakit-ang problema, giduso ni Konsehal Salcedo ang maong hangyo ngadto sa komite sa pamalaod  ug reglamento ubos ni Konsehal Edgar Cabanlas alang sa dugang pagtuon ug  aksyon. (JRG/SP)