Pag-abli sa sports centers, gyms ug uban pa gisugyot ni Konsehal Cabanlas


TUNGOD sa padayong pag-dili sa pag-operate sa mga massage clinic, gym, sports center tungod sa nasinating pandemya, gisugyot ni Konsehal Edgar Cabanlas, chairman sa komite sa Urban and Rural Poor and housing development, ang pagpasar

og ordinansa nga maghatag panugot pag-abli sa maong mga fasilidad ubos sa kondisyon nga tumanon ang minimum health stardards ug kinahanglan nga bakonado na ang mga empleyado niini.

Kini ang unod sa special report ni Cabanlas atol sa sesyon ni-adtong Lunes nga gidumala ni Bise-Mayor Kikang Uy human namatikdan ang pag-ubos sa kaso sa Covid-19.

Gipasabot ni Cabanlas nga higayon na nga hatagan na sa panugot ang katawhan nga maka-adto sa mga gym ug uban pang sports centers aron sila maka-ehersisyo.

Mala-umon si Cabanlas nga makonsidera ug matun-an kini nga panawagan aron sa ingon maminusan ang kamingaw ug kalaay nga nasinate sa katawhan human sa halos sa duha ka tuig nga pag-antos tungod sa Covid-19.

Ang maong sugyot ni Cabanlas giduso kini ni Bise Mayor Kikang Uy sa komite sa health and health insurance ni Konsehal Malou Gaane alang sa dugang pagtu-on ug rekomendasyon.