P11-M kapin alang sa ekipo sa CDRRMD

GILAUMAN nga mas mapalig-on pa ang kinatibuk-ang kapasidad ug kahanas sa syudad sa pagresponde sa mga emerhensya human giaprobahan ang dakong pundo alang sa modernisasyon sa mga ekipo sa pagluwas.

Kini subay sa paglakip sa pundo ubos sa Supplemental Annual Investment Program (SAIP) No. 5 alang sa Fiscal Year (FY) 2026 sa kapin sa P11 ka milyon alang sa City Disaster Risk Reduction and Management Department (CDRRMD).Gamiton ang maong pundo sa pagpamalit og mga importanteng ekipo alang sa ilang operasyon.

Tumong niini nga masiguro ang kaluwasan sa mga lumulupyo ug mapanalipdan ang tibuok komunidad batok sa mga hulga sa kinaiyahan, kalamidad, ug uban pang matang sa krisis.

Aron mapatuman ang modernong operasyon, giplano sa CDRRMD ang pagpalit sa  high-tech drone; desk computer ug laptop nga kompleto sa mga accessories; video wall processor; radio repeater; LCD projector; AED trainer; sets sa CPR training dummy; intelligent solar power; power station with solar panel, portable airconditioning ug network attached storage.

Pinaagi niini nga mga modernong kahimanan, gilauman nga mas mapalapdan pa sa CDRRMD ang ilang operasyon sa pagluwas ug dinaliang pag-abag.

Kini usa ka dakong lakang sa lokal nga kagamhanan aron sa kinatibuk-an, mamahimong "disaster-resilient" ug kanunay nga andam ang syudad sa pag-atubang sa bisan unsang kalamidad. (RNQ/SP)