NFA Patag magamit na pag-distribute sa tag-P20 matag kilong bugas

GIKALIPAY ni Konsehal George Christopher Goking, chairman sa komite sa trade and commerce, nga opisyal nang nag-abli ang bodega sa National Food Authority (NFA)  diha sa Barangay Patag, ning syudad.

Gipahibalo sa konsehal nga nagsugod niadtong Lunes, Hunyo 1, ning tuig ang direktang pagbaligya sa tag-₱20 matag kilo nga bugas ngadto sa publiko diha sa NFA Patag bodega.

Mahinumdoman nga kini ang kusganong gihangyo sa konsehal ngadto sa NFA human nasinati ang kapurwisyo sa pagdagsa sa mga tawo aron sa pag-avail sa tag-P20 nga kilo nga bugas diha sa NFA warehouse sa Baloy, Barangay Tablon.

Dakong kahigayunan kini  alang sa tanang katawhan nga makapahimulos sa maong programa sa kagamhanan ug makapalit sa barato apan de kalidad nga bugas para sa ilang pamilya.

Padayon natong dad-on ang mga serbisyong direkta nga makatabang sa katawhan ug makapagaan sa ilang adlaw-adlaw nga kagastohan, sumpay ni Goking. (RNQ/SP)