TWG mugnaon aron mapadali implementasyon sa P20 rice

Usa ka Technical Working Group (TWG) ang gimugna sa tinguha nga mapadali ang pagpatuman sa implementasyon sa ₱20 Rice-For-All Program dinhi sa dakbayan sa Cagayan de Oro subay sa Ordinance No. 15327-2026 nga naghatag katungod ni Mayor Klarex Uy sa pagpirma sa Memorandum of Agreement (MOA) uban sa Food Terminal Incorporated (FTI).

Kini ang rekomendasyon sa komite sa trade and commerce ubos ni Konsehal George Goking human gituki ang taho ni Konsehal Marlo Tabac mahitungod sa nasinati nga purwisyo sa katawhan nga buot mopalit sa tag P20 nga kilo nga bugas diha sa National Food Authority warehouse sa Barangay Tablon.

Ang maong TWG gilangkoban sa tanang sakop sa City Price Coordinating Council sa panguna ni Atty Egay Uy.

Atol sa tigom, giklaro sa representante sa FTI- Manila nga hangtod karon wala pa nakompleto ang pagsubmite sa mga rekisitos kay sa pagkakaron ang bugtong dokumento nga ilang nadawat mao lamang ang kopya gikan sa legal nga opinyon alang sa ilang pagrepaso.

Aron nga maimplementar ang maong kasabotan gikinahanglan ang syudad mosubmite og letter of intent, SB ug bids and awards resolution, kopya sa MOA, purchase order ug request for stock.

Niini gitahasan sa komite ang TWG sa paghatag og daling aksyon aron mapadali ang implementasyon sa nasangpit nga programa. (RNQ/SP)