Mga IPs sa dakbayan, ubang dapit supak sa House Bill 0621

SUPAK ang   mga Indigenous Peoples (IPs) sa dakbayan sa Cagayan de Oro sa House Bill No. 0621, nga nagtumong sa pag-rationalize sa ancestral lands administration ug mag-amendar  sa  Akta Republika 8371 kon The Indigenous Peoples Right Act (IPRA Law) of 1997.

Kini ang unod sa special report ni Konsehal Roberto Cabaring, chairman sa komite sa cultural communities atol sa sesyon sa Konseho niadtong Lunes nga gidumala ni Presiding Officer Pro Tempore Konsehal Roger Abaday.

Sumala sa konsehal nga ang maong House Bill nakahatag og kalibog  kanilang mga IPs kay mahimong maghatag kinig diskriminasyon sa mga lumad labina nga mawad-an nag gahom ang National Commission on Indigenous Peoples (NCIP) kinsa mao ang responsible sa pagproteher ug pagpromote sa kaayuhan sa mga IPs ug sa mga ancestral domain.

Matod ni Cabaring  nga gawas sa mga Lumad sa dakbayan, nagpadayag  usab sa pagsupak sa maong balaodnon ang mga IPs gikan sa Luzon, Visayas ug Mindanao.

Gidugang   sa konsehal nga kon kini mapalabang, wala nay kalainan sa unang  panahon nga ang nanag-iya sa kayutaan mao ang mga adunahan lamang ug wala nay mabilin nga kulturanhong kinaiyahan kay pribado naman ang manag-iya ingon man sa pagpadagan sa mining, logging ug sa agrikultura.

Niini, ang komite ni Cabaring gipaabot magpahigayon og public hearing aron hingpit nga mahisgotan ang maong balaodnon ug gipaabot nilang dapiton ang NCIP, ang duha ka kongresista sa syudad ug uban pang hintundang personahe ug ahensya nga may kalabotan niini  aron matuki sa husto ang maong balaodnon. (JRG/SP)