Liboan misaksi sa Rebisco Volleyball Sisterhood exhibition 2026
- 5 hours ago
- 1 min read
GIDAGSA sa mga fans ug volleyball enthusiasts ang labing unang Rebisco Volleyball Sisterhood: Fan Meet and Exhibition 2026, nga gipahigayon niadtong Agosto 15 hangtod 16, 2026 diha sa Aquilino Q. Pimentel Jr. International Convention Center, isip kabahin sa Higalaay Festival 2026 sa dakbayan sa Cagayan de Oro.
Ang duha ka adlaw nga kalihokan hugot nga gisuportahan ni City SK Federation President Konsehal Kenneth John Sacala.
Isip chairman sa komite sa sports and youth development sa konseho, personal nga midayeg ang konsehal sa maong inisyatiba nga nagdala sa mga de-kalibreng magduduwa sa nasod dinhi sa dakbayan.
Ang gikahinamang exhibition match mao ang panagtigi sa duha ka higanteng teams sa Premier Volleyball League (PVL)—ang Creamline Cool Smashers ug ang Choco Mucho Flying Titans.
Matod ni Konsehal Sacala nga grabe nga enerhiya ug kadasig ang gipakita sa mga Kagay-anon ug kini nagpamatuod lang nga andam na gayod ang Cagayan de Oro nga mo-host sa mas dagko pa nga nasyonal ug internasyonal nga mga sporting events.
Ang susamang mga kalihokan dili lamang makahatag og kalingawan kondili magsilbi usab nga inspirasyon sa kabatan-onang Kagay-anon nga nagtinguha nga molampos sa natad sa sport basta duna lay saktong disiplina ug determinasyon, dugang ni Konsehal Sacala.
Ang malampusong pagpahigayon sa Rebisco Volleyball Sisterhood: Fan Meet and Exhibition 2026 nahimong posible pinaagi sa hugot nga koordinasyon sa Cagayan de Oro City Sports Events ug sa lokal nga kagamhanan ubos sa liderato ni Mayor Rolando "Klarex" Uy. (RNQ/SP/Photo credits: CIO)
Comments