top of page

Konseho nangusog matunol sa nanginahanglan mga bakanteng socialized housing units

APROBADO na sa Konseho sa syudad ubos ni Bise Mayor Kikang Uy ang ordinansa nga naghan-ay sa giya dinha sa pagkansela sa awards nga gihatag ngadto sa mga benepisaryo sa socialized housing projects sa kagamhanan sa dakbayan.

Ubos sa ordinansa mahimong makansela ang award kun ang usa ka benepisaryo makahimo sa mga kalapasan nga gihana-ay sa balaod human sa ipahigayong pagpahibalo ug pagdungog sa hinungdan sa kalapasan.

Lakip sa mga rason nga makansela ang award mao ang pagkapakyas sa pag-okupar sa unit sulod sa 21 ka adlaw gikan sa pagdawat sa entry pass o’ paghimo sa kinahanglang kalamboan kun lote lang ang na-award sulod sa usa ka tuig gikan sa adlaw sa raffle o’ pagtunol sa Certificate of Award.

Dugang pa sa mga rason mao ang pagkapakyas sa pagbayad sulod sa usa ka tuig sa acquisition cost sa na-award nga lote o’ unit ubos sa makataronganong payment scheme, pagkapakyas sa pagbayad sulod sa duha ka tuig sa legal fees ug uban pang assessment charges subay sa balaod, pagbaligya, pagbalhin o’ pagprenda sa housing unit ngadto ni bisan kinsa gawas lang kun manununod sa principal awardee. Hinuon, ang pagbaligya mahimo lamang kun napulo ka tuig na ang nilabay gikan sa pag-award sa lote o’ housing unit.

Mahimo usab nga makansela ang award kun dili maokupahan ang unit sulod sa usa ka tuig o’ pagtugot sa laing tawo nga maoy mo-ukopa sa unit o’ paghimo sa bisan unsang lakang nga sukwahi sa tumong sa programa ug pagsumete sa mga pekeng rekisitos aron makapahimulos sa socialized housing program sa kagamhanan.

Niini, malaumon ang Konseho nga mapadali ang imbentaryo sa mga bakanteng lote ug housing units aron matunol na kini sa labing nanginahanglang katawhan.

Ang ordinansa nga gipalabang sa Konseho gipangamahanan ni Konsehal Edgar Cabanlas.


Comentários


bottom of page