Konseho motuon sa lakang mapatuman CBMS dinhi’s CDO

GIPAABOT tun-an sa konseho sa syudad ubos ni Bise Mayor Kikang Uy ang lakang mapatuman dinhi sa dakbayan ang Community-Based Monitoring System (CBMS).

Si Mayor Oscar Moreno mibutyag nga ang CBMS gitakdang ipahigayon sa umaabot Hulyo ngadto sa Septembre 2022 ubos sa pagpasiugda sa Philippine Statistics Authority (PSA).

Ang maong programa namugna niadtong Abril 2019 pinasubay sa RA 11315 ug nagsilbing giya dinha sa pag-umol ug pagpatuman sa mga programa nga haum sa panginahanglan sa katawhan.

Kini ipatuman pinaagi sa pagpahigayon og survey ug analysis nga gilantawng makompleto sulod sa duha ka bulan.

Gilantaw nga dako ang matabang sa programa dinha sa pagkuha sa mga angayang data sa socio-economic ug profile sa katawhan sa dakbayan aron mas epektibo ang maumol nga mga palisiya ug proyekto.

Niini, ang konseho gipaabot nga mohatag sa panugot sa mayor nga mopirma sa gikinahanglang Memorandum of Agreement (MoA) tali sa PSA ug DILG alang sa pagpatuman sa programa.