Konseho motuon sa gisugyot nga Oro Env’t Code

GILANTAW’NG mapalapdan pa ang mga lakang pagproteher sa kinaiyahan sa dakbayan sa Cagayan de Oro.

Kini human padayong gitun-an sa konseho ubos ni Bise Mayor Kikang Uy ang gisugyot nga Environment Code diin nakalatid ang mga pamaagi ug patakaran nunot sa balaod nga nagtahas sa konseho pagproteher sa kinaiyahan ug pagpahamtang sa angayang multa ug silot sa mga binuhatan nga maghatag og kadaut sa kinaiyahan sama sa mga kalihokan nga magdala og polusyon, distroso sa kasubaan o’ ecological imbalance.

Lakip sa gisugyot nga mga gidiling kalihokan mao ang pagputol sa mga bisan unsang matang sa kahoy nga nagtubo o’ natanom dinha sa mga publikong lugar, plaza, center islands sa highways, mga tunghaan ug kilid sa mga suba gawas lang kun gikinahanglan alang sa kapaseguroan sa katawhan ingon man ang paglansang, pagpilit o’ pagbitay dinha sa mga natanom nga kahoy.

Gidili usab ang pag-convert sa mga forest lands ngadto sa residential, commercial, recreational o’ eco-tourism gawas kun gikinahanglan.

Ang sugyot magpahamtang og multa nga P3 mil alang sa unang kalapasan, P4 mil sa ikaduhang kalapasan ug P5 mil sa ikatulo ug sunod pang mga kalapasan.

Ang sugyot nga Environment Code gihingusgan ni Konsehal Eric Salcedo, chairman sa komite sa environment, nga mapalabang sa tinguha nga mahan-ay ang tanang lakang nga gitumong sa pagproteher sa kinaiyahan.