Konsehal Esparcia nangusog paghatag seguridad sa mga pasahero sa taxi

NANGUSOG si Konsehal Bernie Esparcia nga mahatagan sa hingpit nga kapasegurohan ug seguridad ang mga pasahero sa taxi dinhi sa syudad.

Kini ang unod sa special report sa konsehal sa session sa Konseho niadtong Lunes nga gidumala ni Bise Mayor Bebot Rodriguez mahitungod sa mga pipila ka reklamo nga nadawat  gikan sa mga pasahero  tungod sa gipakitang dili maayong taras ug bastos nga pamatasan sa  pipila ka mga taxi drivers.

Matod sa konsehal  nga ang taxi mao ang  usa sa unang gapilion nga transportasyon sa mga pasahero labina sa gasulod sa Amihanang Mindanao tungod giingong sila ang gikonsidera nga pinaka masaligan nga tao sa mga  bisita.

Sa laing bahin, mipahibalo si Konsehal Esparcia nga aduna karo’y mga bag-ong apps nga dako og ikatabang sa seguridad sa pasahero tungod didto  makita ang hulagway ug tanang  impormasyon sa mga drivers nga masakyan ug  siya nanghinaot nga makonsidera kini sa hintungdang komite.

Ang report ni Esparcia giduso ni Bise Mayor Rodriguez sa Komite sa Public Utilities ubos ni Konsehal Romeo Calizo alang sa dugang pagtuon ug aksyon.