Komite ni Daba nipatino kon asa gayod hustong lokasyon sa ilang operasyon

GIHIKLING una sa komite sa games and amusement sa konseho sa dakbayan ubos ni Konsehal Moreno Daba ang aplikasyon sa South East First Gaming Corporation alang sa pag-establisar ug pag-operate sa traditional ug electronic bingo diha sa ikatulong andana sa Gaisano Mall.

Ang maong desisyon gihimo sa komite kay naglibog kini kon asa nga barangay angay mokuha og lokal nga mga dokumento ang maong establisemento, tungod kay ang edipisyo sa mall nasakop man sa utlanan sa Barangay 25 ug Barangay 26.

Sa gipahigayon nga tigom sa komite niadtong Martes, gibutyag  ang aplikante nga anaa sa Barangay 26 nahimutang ang mismong dapit sa ilang operasyon apan tungod kay  ang  Gaisano didto man  naglukat sa pikas barangay kay didto nahimutang ang ilang main office, maong igo lang pud silang misunod sa gihimo sa Gaisano.

Gipasabot sa City Planning and Development Office (CPDO) nga kinahanglan gayod kining matin-aw kon asa gyod dapit ang operasyon, tungod kay kon asa kini nahimutang, didto usab sila molukat sa mga gikinahanglang permit ug rekisitos aron isuporta sa ilang aplikasyon.

Sa pikas bahin, gipasalig usab ang maong kompanya nga andam silang mosunod ug motuman sa bisan unsang isitar sa balaod sa syudad alang sa maong katuyoan. (JRG/SP)