Kabatan-onan sa Barangay 13 makabenipisyo sa SK Budget nga giaprobahan sa konseho

GILAOMAN nga mas mapalapdan  pa ang mga programa alang sa mga batan-on sa Barangay 13 human gideklarar sa Konseho sa Dakbayan nga mahimo nang ipatuman  sa kinatibuk-an  ang tinuig nga budget sa ilang Sangguniang Kabataan (SK) nga nagkantidad og P600,000.00.

Sa sesyon sa konseho kagahapon nga gipangulohan ni Bise Mayor Bebot Rodriguez, gisagop ang resolusyon nga nagpalig-on sa Resolution No. 22 sa Barangay 13 SK.Kini nagpasabot nga pwede nang magamit ang maong pundo sa labing madaling panahon alang sa SK Youth Development and Empowerment Programs.

Lakip sa gipundohan  sa maong budget ang programa sa edukasyon pinaagi sa paghatag og education rewards sa mga tinun-an ug pagpahigayon og educational supply drive aron matabangan ang mga kabos nga estudyante, programa sa panglawas pinaagi sa pag-organisar og blood-letting activity ug  programa  sa environment nga nangusog  pagpatuman sa solid waste management aron mapadayon ang kalimpyo sa barangay.

Dugtong niini,  magpahigayon usab  ang Barangay sa  Barangay 13 Got Talent, pagbuhi sa mga Larong Pinoy, ug pagpahigayon sa youth capacity building ubos sa programa sa active citizenship, paglusad sa Anti-Drug Symposium aron giyahan ang mga batan-on palayo sa mga dautang bisyo ubos sa programa sa security and peace building ug uban pa.

Nahatagan sa daling pag-apruba ang maong budget tungod sa dako nga suporta gikan sa duha ka komite sa konseho. Kini mao ang komite sa youth and sports development ubos ni Konsehal Kenneth John Sacala, ug ang komite sa pamalaod ug reglamento nga gipangulohan ni Konsehal Ed Cabanlas. (JRG/SP)