Daba nag-aghat sa kabataan pag-apply sa 2026 City Scholarship Program

“Ang kakabus dili babag sa kalampusan”.

Kini ang pagpasabot ni Konsehal Jing Daba, chairman sa komite sa edukasyon, ngadto sa katawhan sa dakbayan.

Siya nanawagan sa mga interesado ug kwalipikadong tinun-an sa siyudad sa pag-aplay sa 2026 College City Scholarship Program sa dakbayan kay nagsugod na ang online application (bit.ly/OnlineApplication2026).

Ang pagpangdawat nagsugod niadtong Pebrero 3 ug matapos sa umaabot Marso 15, 2026.

Matod ni Daba nga ang kagamhanan migahin og igong pundo sa mamahimong iskolar sa dakbayan alang sa tuig 2026-2027.

Kun mapili sila nga benepisaryo sa maong programa, dako kini nga kahigayonan nga makaangkon sila sa mahayag nga kaugmaon.

Niini si Konsehal Daba kusganong nanawagan sa mga ginikanan ug nag-aghat sa mga tinun-an sa pagpahimulos niining talagsaong kahigayonan nga gihatag  sa syudad.

Nagpahinumdom ang konsehal sa mga aplikante nga kinahanglan kumpletohon gayud ang ilang mga rekisitos aron makakuha sa qualifying exam.

Alang sa dugang detalye ug kasayoran, mahimong bisitahan ang FB page sa CDO City Scholarships Office o motawag sa numero 0929-819-0819. (RNQ/SP)