CNA, SRI, PMI sa mga kawani gipundohan sa SAIP 5

GIUYONAN sa Konseho atol sa sesyon sa Lunes nga gidumala ni Bise Mayor Bebot Rodriguez ang Supplemental Annual Investment Program (SAIP) No. 5 alang sa Fiscal Year 2026.

Nasulod sa SAIP No. 5 ang pundo nga mobalor og ₱679,998,234.83, aron magamit sa pagpatuman sa mga Priority Programs, Projects, and Activities (PPAs) sa kagamhanang lokal sa dakbayan sa Cagayan de Oro ubos sa administrasyon ni Mayor Klarex Uy.

Ang maong mga proyekto ug programa gitumong aron makabenepisyo ang mga residente sa nagkalain-laing barangay sa siyudad, ug aron masiguro nga padayon ang paglambo sa Cagayan de Oro isip sentro sa komersyo sa Northern Mindanao.

Lakip sa gipundohan mao ang nagkalain-laing benepisyo sa mga kawani sa City Hall. Gilangkoban kini sa Collective Negotiation Agreement (CNA), Service Recognition Incentive (SRI), ug Personnel Motivation Incentive (PMI).

Ang paggahin niini nga pundo gitumong sa paghatag og bili sa kakugi ug dedikasyon sa mga empleyado sa City Hall kinsa nagtanyag sa epektibong serbisyo ngadto sa mga Kagay-anon. (RNQ/SP)