Climate Resilience, NBS Investment Mechanism Ordinance hisgotan

MAGPAHIGAYON sa hiniusang tigom karong Biernes, Oktubre 2, sa alas 2:00 sa hapon diha sa hawanan sa konseho ang mga komite sa Environment ni Konsehal Enrico Salcedo, Trade ni Konsehal George Goking, ug Climate Change ni Konsehal Paolo Nicolo Gaane aron tukion ang gisugyot nga "Cagayan de Oro Climate Resilience and NBS Investment Mechanism Ordinance."

Ubos niini, magmugna ang syudad og market-based mechanism aron maaghat ang pribadong sektor ug mga magpapatigayon nga mag-invest sa Nature-based Solutions (NBS).

Ang maong green investment gamiton sa pagpanalipod sa Cagayan de Oro River Basin, sama sa pagpananom diha sa mga watershed ug pagpalig-on sa daplin sa sapa (riparian buffers) aron malikayan ang pagbaha ug pagdahili sa yuta.

Gipaabot nga motambong sa maong tigom sila si Bukidnon Congressman Jose Manuel Alba, Bise Mayor Bebot Rodriguez, Konsehal Marlo Tabac, Datu Roberto Cabaring, ug mga hepe sa pipila ka departamento sa City Hall aron mohatag sa ilang rekomendasyon ug opinyon bahin sa maong sugyot ordinansa. (RNQ/SP)