Cabaring nangusog mapalig-on panaghiusa tali sa mga lumad ug sector sa edukasyon

“ANG tinuod  nga kalig-on  sa usa ka komunidad makita sa iyang abilidad  sa pagpaminaw, pagtinabangay  ug pagtahod sa katungod sa matag-usa.”

Kini ang pamahayag ni Konsehal Roberto Cabaring, IPMR ug chairman sa komite sa cultural communities sa konseho, atol sa gihimong consultation meeting  didto sa Balongkot Integrated School.

Gihisgotan sa maong tigom ang  mga katin-awan sa  mga pamaagi nga angayang pagabutahon  alang sa hapsay ug malinawon  nga proseso sa pagtuki sa kahimtang sa yuta nga nahimutangan sa  maong tunghaan.

Nagsilbing higayon usab  kini  alang sa diyalugo ug pag-ambitay sa ilang panlantaw aron  mapalig-on ang pagsinabtanay  diha sa pagpangita og solusyon subay sa balaod, sa katungod sa Indigenous Cultural Communities/Indigenous People, ug interest sa sektor sa edukasyon.

Gipasabot  ni Konsehal Cabaring  nga pinaagi sa padayon nga konsultasyon  ug maayong pagtinabangay mapalig-on  ang kalinaw ug malungtaron nga kaugmaon.Mitambong  sa maong konsultasyon ang mga pangulo sa  komunidad, representante sa Nahilaran  Indigenous Political  Structure ug  mga magtutudlo. (JRG/SP)