Abaday naninguha nga mapalamboang koordinasyon batok illegal drugs

GITINGUHA ni Konsehal Roger Abaday, chairman sa komite sa public order and safety, nga mas mapalambo ug mas mapalig-on pa ang koordinasyon sa tanang hintungdan ahensya sa goberno sa tuyo nga mapakgang ug malikayan nga makasulod ang mga ilegal nga droga sa dakbayan.

Kini ang unod sa special report ni Konsehal Roger Abaday atol sa sesyon niadtong Lunes nga gidumala ni Bise Mayor Bebot Rodriguez.Sumala ni Abaday nga angayang palapdan pa ang hugot nga pag-monitor ug koordinasyon sa kapolisan ug sa Philippine Coast Guard, Philippine Drug Enforcement Agency (PDEA), kasundalohan, ug lakip na ang lokal nga kagamhanan aron masanta ang mga ilegal nga kalihokan.

Gitumbok sa konsehal ang nasakmit nga male-maletang shabu didto Laos ug Thailand nga giingong i-deliver sa Pilipinas. Dugang sa konsehal nga daghan usab nga mga illegal nga droga ang nasakmit didto sa syudad sa Iligan ug sa ubang bahin sa nasud.

Siya midugang nga sumala sa datus nga iyang nadawat gikan sa PDEA, sugod sa bulan sa Enero hangtod sa Septembre ning tuig, moabot na sa 56 ka buy bust operation nga gihimo sa kapolisan diin nakuha ang 5.64 kilogram nga shabu nga moabot sa minilyon ang standard drug price.

Subay niini, gisugyot ni Abaday nga dapiton alang sa tigom ang mga nagkadaiyang ahensya sa goberno sa syudad aron tukion ang mga pamaagi nga malikay ang syudad sa maong panghitabo.

Giduso ni Bise Mayor Bebot Rodriguez ang maong taho ni Konsehal Abaday ngadto sa komite sa barangay affairs ubos ni Konsehal Marlo Tabac ug sa komite sa public order and safety ni Konsehal Roger Abaday alang sa dugang pagtuon ug rekomendasyon. (MLR/SP)