Abaday nanawagan sa responsableng paggamit sa social media

NANAWAGAN si Konsehal Roger Abaday, chairman sa komite sa public order and safety, sa publiko alang sa responsable nga pag-post diha sa social media.

Kini aron  malikayan ang kabalaka ug kahadlok sa mga ginikanan ug sa katawhan sa dakbayan.

Kini ang gipaambit nga pamahayag ni Abaday sa special report ni Konsehal Imee Rose Moreno atol sa sesyon niadtong Lunes nga gidumala ni Bise Mayor Bebot Rodriguez kabahin sa nagkatag nga isyu sa social media diin sa usa ka minor de edad ang nanghulga nga mohimo og krimen sa pipila ka mga pampublikong tunghaan sa syudad.

Sumala ni Abaday nga kinahanglang sutaon ug imbistigahan pag-ayo ug dili gilayon e-share ug ipakatap sa social media ang dili sigurado nga taho o panghitabo aron dili makahatag og kayagaw ug kakuyaw sa katilingban.

Gipasalamatan sa konsehal ang mga magtutudlo sa Bulua National High School sa daling pag-padangat sa taho ngadto sa awtoridad alang sa dinaliang aksyon.

Niini malaumon si Konsehal Roger Abaday nga sa hiniusang pagpakabana sa tanang hintungdang ahensya sa goberno ingon man sa mga ginikanan, masanta ug malikayan ang mga plano nga adunay dautang katuyoan. (MLR/SP)