Abaday nagpasalamat sa mga opisyal sa Bulua Elem. School, kapolisan

GIPASALAMATAN ni Konsehal Roger Abaday, chairman sa komite sa public order and safety, ang kadagkoan ug opisyal sa Bulua Elementary School sa daling pag-aksyon pinaagi sa pagkoordinar sa Barangay ug sa kapolisan aron daling masuta ug ma-imbestigar ang giingong pagpanghulga sa maong tunghaan nga gikabalaka sa mga ginikanan ug mga magtutudlo.

Sumala ni Abaday nga human madawat sa kapolisan ang maong taho, gilayong mimando si City Police Director P/Col. Dexter Paje sa iyang mga ginsakpan sa pag-imbestigar ug sa pagsuta sa responsable nga mihimo sa nasangpit nga pagpanghulga.

Gisugyot ni Abaday ang partisipasyon sa opisina sa Women and Children’s Desk, ilabi na kay ang maong kaso naglambigit sa minor-de edad aron usab masunod ang insaktong pamaagi ug proseso.

Nunot niini, malaumon si Abaday nga mapalapdan pa sa buhatan sa Department of Education (DepEd), sa kapolisan ug ubang ahensya sa goberno ang koordinasyon aron masiguro nga luwas ang mga tinun-an ug mga magtutudlo sa matag tunghaan sa syudad. (MLR/SP)