Abaday misugyot sa regular nga pagbansaybansay sa kabarangayan

GIHINGUSGAN ni Konsehal Roger Abaday, chairman sa komite sa public order and safety, nga pinaagi sa tabang sa nagkadaiyang ahensya sa goberno sama sa Bureau of Fire Protection (BFP), kapolisan ug sa City Disater Risk Reduction and Management Department, himoon ang regular nga pagbansay-bansay sa mga Barangay Tanod sa matag barangay sa syudad.

Kini ang gisugyot ni Abaday atol sa gihimong hiniusang tigom sa komite sa public order and safety, komite sa climate change ug komite sa barangay affairs, diin gihisgotan ang pagpahanas sa mga barangay tanod aron sila masayog sa angay nilang buhaton panahon sa tawag sa panginahanglan sa ilang barangay.

Dugang ni Abaday nga gawas sa mga barangay tanod, mas maayo usab nga adunay kooperasyon ug partisipasyon ang mga residente sa maong pagbansay-bansay aron daling mapakgang ang mga daotang hitabo sa dili pa mahidangat ang mga awtoridad o kabomberohan.

Nunot niini, gihangyo ni Konsehal Abaday ang mga hintungdang ahensya sa goberno nga mosumite sa ilang rekomendasyon alang sa nasangpit nga programa. (MLR/SP)