Abaday mihatag katin-awan sa pahayag nga dili ibilanggo ang mga durogista

Si Konsehal Roger Abaday, chairman sa komite sa public order and safety, mihatag katin-awan sa iyang pamahayag mahitungod sa mikalat nga isyu nga ang mga durogista dili na ibilinggo.

Sa iyang gipadangat nga special report atol sa sesyon niadtong Lunes nga gidumala ni Bise Mayor Bebot Rodriguez, giklaro ni Abaday ang isyu nga miluwat kini og pamahayag nga dili na angay prisohon ang durogista sa rason nga boluntaryo na  kining mitahan sa iyang kaugalingon ug gustong mopa-ubos sa usa ka rehab aron matambalan ug mag-usab na sa iyang kinabuhi ug malikay na subli sa maong bisyo, sumpay sa konsehal.

Nagtuo ang konsehal nga gihatagan kini og dili maayong kahulogan o pagsabot diha sa social media nga miani sa mga pagsaway.

Nanawagan ug naghangyo si Abaday sa katawhan nga unta mahimong responsable sa ilang ipagawas diha social media aron dili makahatag sa kadaot sa matag usa kanato.

Malaumon si Konsehal Abaday nga napasabot niya sa katawhan ang isyu nga mikatag karon diin tumong niiini nga ipaambit ang mga programa sa goberno nga aduna pay paglaom ang mga durogista nga magbag-o pinaagi sa pagpa-ubos sa rehabilitasyon. (MLR/SP)