Abaday gitagad ang hangyo sa mga mag-uuma sa kabukiran

KALISOD sa sakyanan aron mapaabot sa mga mag-uuma sa kamerkaduhan ang ilang mga lagutmon ug kun adunay sakyanan apan dili nila magahum ang bayad ug ang kanunay silang abugon diha sa kamerkaduhan maoy pipila sa problema ug mulo nga gipadangat sa mga mag-uuma diha sa kabukiran.

Kini ang unod sa special report ni Konsehal Roger Abaday, chairman sa komite sa Senior Citizen atol sa sesyon niadtong Lunes nga gidumala ni Bise Mayor Kikang Uy.

Matod ni Abaday nga gipaabot kaniya ang kalisod nga natagamtam sa mga mag-uuma kabahin sa ilang panginabuhian ilabi na sa ilang mga produkto nga gusto nilang mahatod sa kamerkaduhan.

Matud ni Abaday nga naghangyo ang mag-uuma nga unta mabalik kanila ang tabang sa goberno lokal nga libreng sakyanan nga maoy kargahan sa ilang mga lagutmon ug adunay igahin kanila nga adlaw sa pagbaligya sa kamerkaduhan nga diin dili sila pang-abugon.

Niini, si Abaday naglaum nga matabangan unta ang hangyo sa mga mag-uuma sa Barangay Dansolihon, Tignapoloan, Besigan ug uban pang kabarangayan sa kabukiran nga nagkinahanglan sa panabang sa goberno.

Nunot niini, giduso ni Bise Mayor Kikang Uy ang maong special report ni Konsehal Abaday ngadto sa komite sa Agrikultura ni Konsehal Jay Roa Pascual alang sa tukmang aksyon ug rekomendasyon.