Drug Test Lab sa CdeO matukod na

GILANTAW NGA MASUGDAN na ang operasyon sa Drug Testing Laboratory sa kagamhanan sa dakbayan.

Kini human gitun-an sa komite sa panglawas ni konsehal Malou Gaane ang sugyot ordinansa nga nag-establisar sa Cagayan de Oro City Free Standing Screening Drug Testing Laboratory.

Ang maong lakang pinasubay sa Section 15 sa Local Government Code nga nagmando sa mga lokal nga kagamhanan pagpatuman sa mga lakang nga magdala og kaarangan sa kinabag-ang katawhan.

Lakip sa gibasehan sa sugyot balaodnon mao ang RA 9165 kon Comprehensive Dangerous Drug Act of 2002 sa tinguha nga mahatagan sa kalampusan ang programa nga mapakgang ang paggamit sa gidiling mga droga.

Niini, ang laboratoryo sa City Health Office magsilbi sa katawhan sa dakbayan ingon man sa kasikbit nga mga LGUs.

Ubos sa sugyot, adunay gipahamtang nga service fee nga P100 ngadto sa P250 nga drug testing fee base sa maaprobahan sa gobyerno samtang kadtong mga Philhealth members, dependents ingon man mga hamtong ug sakop sa Pantawid Pamilyang Pilipino Program (4Ps) dili na kinahanglang mobayad.

Ang laboratoryo dumalahon sa City Health Officer sa pag-abag sa usa ka pathologist.

Dahino nangita sa listahan sa water system

projects nga gipundohan sa Water District

Asa na ang mga proyekto?

Mao kini ang pangutana ni konsehal Edna Dahino atol sa sesyon sa konseho niadtong Lunes nga gidumala ni bise mayor Kikang Uy.

Si Dahino subling nanawagan sa Cagayan de Oro Water District (COWD) pagsumete sa listahan sa mga proyekto sa panubig nga gipundohan nga sa kasamtangan mobalor na og P78 milyones.

Kini base sa gitanyag sa kompanya nga tag-P6 milyones matag tuig sugod niadtong tuig 2006 nga gamitong pundo alang sa lain laing proyekto sa panubig sa kagamhanan sa dakbayan.

Gani, matod sa konsehal, wala nangayo ang syudad sa 1% gikan sa gross income sa COWD nga mao untay angayangang singilon nga bahin sa syudad subay sa balaod apan gihimo na lamang nga P6 milyones matag tuig taliwala nga nagkadako ang populasyon.

Gusto masayran ni Dahino kun onsa nga mga proyekto nga gigastohan ug kun nagamit ba kini sulod sa nilabayng 13 ka tuig.

Daghan nga mga barangay ang adunay dako nga problema sa panubig karong panahona ilabina ang barangay Indahag. Asa na nakapaingon ang pundo, pangutana ni konsehal Edna Dahino.

Niini, si bise mayor Kikang Uy miduso sa taho ni konsehal Dahino ngadto sa komite sa public utilities ni konsehal Bong Lao alang sa pagtuon ug rekomendasyon. (SP/APD)