Tag-iya sa loteng gigamit nga dalan mihangyo nga mabayran

Konsiderahon sa komite sa subdivision and landed estate ni konsehal Dometilo Acenas Jr ang sulat hangyo nga gipaabot ni Ramon Fernandez ug Pamela Emopano, mga molopyo sa barangay Carmen.

Kini kalabot sa ilang lote dinha sa Carmen nga adunay Tax Declaration No. G-108758; G-108344 ug G-108335 nga giingong gigamit sa kagamhanan sa syudad dinha sa pagpatuman og proyekto pag-abli og dalan.

Matod nila nga dugay na silang naghulat nga mabayran sa kagamhanan ang ilang claim for just compensation apan pila na ka tuig ang milabay wala gihapoy seryoso nga paningkamot nga mabayaran sila sa ilang gihangyo.

Niini, sila hugot nga mihangyo sa kagamhanan nga mahatagan kini sa igo nga pagtagad ug gani andam sila nga moatubang sa tigom kun sila ipatawag aron nga maresolbar ang maong isyu dala ang panghinaut nga mabayran na sila sa kagamhanan. (Yonggals)