Community Mortgage Program ipatuman dihas Hilltop H’owners

Gilantawng mahatagan sa dugang kaarangan ang kinabuhi sa mga sakop sa Hilltop Upper Community Homeowners Association Inc (HUCCAI) sa barangay Carmen.


Kini human ang konseho sa syudad ubos ni bise mayor Kikang Uy, sa sesyon niadtong Lunes, mipalabang sa ordinansa nga naghatag og katungod ni Mayor Oscar Moreno pagpirma sa Memorandum of Agreement (MoA) tali sa kapunungan alang sa pagpatuman sa Community Mortgage Program (CMP) sa Social Housing Finance Corporation (SHFC).


Nasayran nga ang kapunungan naglaraw sa pagpalit sa porsyon sa loteng gipanag-iyahan sa Imperial Development Corporation sa Upper Carmen aron matukuran sa ilang mga panimalay pinaagi sa programa.


Si konsehal Ian Mark Nacaya, chairman sa komite sa pamalaod ug nagpaluyo sa gipalabang nga ordinansa, miingon nga subay sa probisyon sa Local government Code, ang kagamhanan gitahasan sa pagpatuman sa comprehensive ug continuing urban development program nga maghatag og kaarangan sa kondisyon sa kinabuhi sa mga kabus ug walay panimalay.


Niini, ang syudad gitahasan nga moabag sa pagproseso sa aplikasyon ug mga dokumento hangtod matunol ang mga lote ngadto sa mga benepisaryong sakop sa kapunungan

Samtang ang kapunungan gitahasan subay sa maong MoA pagmugna og tukmang mekanismo nga mapaabot sa kagamhanan ang kahimtang sa aplikasyon sa mga benefisaryo sa SHFC.


Ang ordinansa nga gipalabang sa konseho alang sa maong katuyoan gipaluyohan sa komite sa subdivision and landed estate ni konsehal Dometilo Acenas ug komite sa pamalaod ni konsehal Ian Mark Nacaya.