Dialogo tali sa 2 assns dihas Tablon gitakda



Si konsehal Zaldy Ocon, chairman sa komite sa urban and rural poor sa konseho, mopahigayon og dialogo tali sa mga residente sa Purok 13, barangay Tablon sa umaabot Marso 11, 2018 uban sa mga opisyal sa barangay, City Housing and Urban Development Department ug representante gikan sa Land Bank of the Philippines.


Matud ni Ocon nga walay lain solusyon aron masulbad ang panagbangi sa mga molopyo kun dili lingkoran ug hisgutan ang problema aron mapangitaan sa alibyo.


Nasayran nga nabahin sa duha ka asosasyon ang nanimuyo sa dapit. Kini mao ang TABUCNAI nga gipangulohan ni Alberto Sales ug ang Mindanawan V Watch Neighborhood Association ubos ni Lydia Butuan kinsa parehang nagkabangi sa loteng ilang giokupahan nga gipanag-iyahan sa Land Bank of the Philippines.


Atol sa tigom sa komite sa milabayng semana, gikompirma ni Dennis Corvera sa Land Bank nga napalit na nila ang nahisgotang lote gikan sa tag-iya apan andam ang bangko nga mobaligya sa lote kun adunay interesado nga mopalit.


Niini, ang duha ka kapunungan mipakita sa ilang interest nga mopalit apan dili magkasinabtanay butang nga gikonpirmar ni barangay kagawad Angel Pumar sa Tablon nga diin nakaabot na kini sa ilang barangay nga problema sa pipila ka mga higayon apan walay nakab-ot nga pagsinabtanay.


Nunot nini, si Ocon malaumon nga makab-ot ang panaghiusa kay kining tanan alang man sa kaayuhan sa mga residente sa dapit. (El Kapitan)