Suzette gipasalamatan sa taga-West Elem School

Dako ang pasalamat sa mga opisyales sa Federated-PTA sa West City Central School ngadto ni konsehal Suzette Magtajas-Daba, chairman sa komite sa edukasyon ug sa kadagkoan sa Department of Education, City Schools Division (DepEd -CSD).

Kini human naaprobahan ang hangyo sa mga ginikanan sa tunghaan nga makasuot og toga panahon sa gradwasyon karong tuiga ang ilang mga anak.

Sa milabayng tigom sa komite, gituki ang giluwatang memorandum no. 59-2017 sa DepEd nga nagdili sa pagsuot sa toga atol sa umaabot nga gradwasyon.

Gipasabot sa maong memo nga hinungdan sa maong regulasyon mao ang pagdaginot sa mga ginikanan nga dili na angayang mogasto pa og dako.

Ang representante sa mga ginikanan namahayag nga ang pagsuot sa toga dili dako ang gasto sa mga ginikanan kun itandi sa school uniform.

Mahinumdoman nga ang mga tinun-an wala na pugsa sa paggamit sa school uniform ug angayan lamang magtoga ang mogradwar aron usab disente kini ug lahi sa adlaw-adlaw nga suot.

Ang kalamposan sa usa ka anak angayan lamang hatagan ug dignidad ug mauban ang ilang mga ginikanan. Ang buhatan sa DepEd midogang nga sila uyon sa paggamit sa toga apan wala usab magpasabot nga did-an sa pagpaso ang wala makatoga. (APD)