Pundo alang sa streetlights sa Coastal Road gihangyo

Nagplano si konsehal Zaldy Ocon, chairman sa komite sa public works, nga magsulat kang kongressman Maximo Rodriguez sa ikaduhang distrito sa dakbayan aron hangyoon nga magahinan og pundo ang pagbutang og streetlights diha sa Coastal Road.

Kini subay sa tambag sa kadagkoan sa Department of Public Works and Highways (DPWH) Regional Office 10.

Atol sa milabayng tigom sa komite, gibutyag ni Engr. Leonard Pecore, representante sa DPWH 10 nga mahimong hangyoon sa komite si Rodriguez alang sa maong katuyuan.

Hinoon, giklaro ni Pecore nga nagpadangat na usab ang ilang rehiyunal nga buhatan og sulat ngadto sa ilang main office sa Manila aron mapunduhan ang maong proyekto apan tungod kay adunay pagkalangan niini mahimong makangyo sa ubang ahensya sa gobyerno nga maoy mogahin og pundo.

Nunot niini, matod ni konsehal Ocon nga iyang sulayan nga sulatan dala sa paghangyo si kongresman Rodriguez aron makutayan na sa sugang dagitab ang Coastal Road kay matud pa sayang ang maong proyekto nga nakatabang unta sa pagpagaan sa trapiko sa syudad apan delikado panahon sa gabii kay ngitngit pa ang dapit. (El Kapitan)