913 establisamento sa CdeO anaa sa negative list sa CFD

Mokabat sa 913 ka mga establisamento sa dakbayan ang anaa sa negative list sa Cagayan de Oro Fire District.

Mao kini ang gibutyag ni Senior Fire Officer 4 Arnulfo Nabua atol sa milabayng tigom sa komite sa police, fire and public safety ni konsehal Romeo Calizo.

Sa maong tigom gituki ang panawagan ni konsehal Edna Dahino nga masusi ang fire safeness sa mga edifisyo dinhi sa syudad ilabina kadtong mga dagkong tindahan aron malikayan ang susamang nahitabo sa NCCC Mall sa Davao City.

Subli, si Dahino mipasabot nga gikinahanglan nga malikayan ang maong panghitabo ug mapangitaan sa paagi pinaagi sa pagpanday og balaod nga masunod sa mga tag-iya ug tigdumala sa mga dagkong edifisyo aron walay kinabuhi nga makalas gumikan lang kay wala magpakabana ang mga opisyal sa hintungdang ahensya sa gobyerno ug sa lokal nga kagamhanan.

Niini, si Nabua mibutyag nga adunay gihimong fire safety inspection ang ilang buhatan diin gihatagan sa abiso ang mga tag-iya ug tigdumala sa paghimo sa mga gikinahanglang lakang sa panahon nga adunay makit-ang mga kalapasan.

Apan, matod niya, usa sa nakababag sa ilang paningkamot nga mamahimong fire safety ang tanang edifisyo sa Cagayan de Oro mao ang intervention sa pipila ka dagkong opisyal sa gobyerno ingon man ang padayong pag-isyu sa business permit taliwala nga walay mapresentar nga Fire Safety Certificate ang usa ka establisamento.

Gani, matod niya nga kadtong mga anaa sa ilang negative list nakakuha gikapon sa ilang business permits.

Niini, si konsehal Calizo uban nila ni konsehal Bong Lao ug Dahino hugot nga mipasalig nga tutukan ang pagpanday sa balaod nga mag-require sa tanang establisamento pagsunod sa fire safety tungod kay dili angayan nga magsakripisyo pa og mga kinabuhi aron lang mahatagan sa leksyon ang tanan.