Kikang milantaw sa dugang benepisyo sa katawhan sa 2018

Sa pagsugod sa tuig 2018, dako ang panghinaut ni bise mayor Kikang Uy nga maangkon sa dakbayan sa Cagayan de Oro ang dugang pang kaarangan.


Sa gihimong flag raising ceremony sa City Hall kagahapon, ang bise mayor mibutyag nga sa ipalabang nga 2018 annual budget, dugang benepisyo alang sa katawhan, dugang proyekto sa imprastraktura ang mapatuman, dugang hospitals ug school buildings ang matukod ug daghang mga Kagay-anon ang makaangkon sa ilang desente ug kaugalingong mga pinuy-anan.


Siya mipasalig sa panerbisyo alang sa kaarangan sa dakbayan sa Cagayan de Oro uban sa leadership ni mayor Oscar Moreno. Sa bag-ong tuig, dako kaayo ang iyang panghinaut nga maiway ang dakbayan sa mga kalamidad. Kun kini moabot, malaumon ang bise mayor nga sama sa 2017, magpabilin untang zero casualty ang dakbayan.


Unta, niining 2018, ang labing importante mao ang healing ug dili ang kasakit. Kinahanglang manambal ta ug dili magpasakit sa isig katawo. Molahutay ug dili mohunong, mohigugma ug dili masilag, dili ang paghigugma sa mga kauban sa trabaho kun dili ang pagpalangga sa isig katawo, dugang sa bise mayor.


Labing bililhon sa 2018 mao ang kabilihon sa paghatag kaysa pagdawat. Unta mao kini ang atong mapakita sa atong isig katawo. Kita committed to serve subay sa balaod. Atong sundon nga kun “what is right, keep it right, what is wrong make it right”, panapos ni bise mayor Kikang Uy.