Kaarangan sa operasyon sa kamerkadohan gihingusgan

Padayon si konsehal Ian Mark Nacaya nga nangusog mapalambo ang operasyon sa kamerkadohan sa dakbayan.

Sa tigom sa komite sa economic enterprises gahapong adlawa, si Nacaya nakig-dialogo sa hepe sa PLDT sa tinguha nga masolosyonan ang giingong kahinay sa internet connection tali sa merkado sa Cogon ug Carmen ug sa City Treasurer’s Office (CTO) sa City Hall.

Kini human si Engr. Leonil Mistula, hepe sa Computer Division sa CTO, mipasabot nga dako kaayong tabang alang sa epektibong collection sa kamerkadohan ang gipatumang automation system.

Niini, ang mga mamaligyaay, panahon nga molukat o’ morenew sa ilang business permit dili na maglisod sa pagbayad tungod kay mahimo man kini online, dugang pasabot ni Mistula.

Sa maong dialogo, si Nacaya uban nila ni konsehal George Goking ug Reuben Daba mipaabot sa ilang dakong panghinaut nga maaksyonan sa PLDT ang hangyo nga mapalambo ang internet connection aron dili na maglisod sa ilang koleksyon ang CTO ug usab mahatagan sa kasayon ang mga market vendors sa renewal sa ilang permits sa pagsugod sa Pebrero 1, 2017.