Dahino miaksyon sa mulo sa taga-San Simon

Daling giaksyonan ni konsehal Edna Marban-Dahino ang mulo sa mga molopyo sa barangay San Simon ug kasikbit nga mga barangay nga maagian sa water waste gikan sa bag-ong dumpsite diha sa barangay Pagalungan.

Kagahapong adlawa, si Dahino isip vice chairman sa komite sa environment and natural resources, uban sa representante sa mga hintungdang buhatan mihimo sa pagsusi sa dapit sa tinguha nga mahatagan sa katin-awan ang maong mulo.

Matod pa nga ang water waste gikan sa bagong landfill sa panahon sa ting-ulan mag-overflow ug moagi sa sapa ug gituohan nga kini nagdala og toxic o’ poisonous waste diin ang katawhan giingong mibati sa pagpangatol sa ilang mga panit ug usab nangamatay ang mga isda sa maong sapa.

Ang maong tubig matigom sa Iponan river ug delikado nga daghan na ang maapektohan.

Si kapitan Rudolfo Macario sa San Simon uban sa mga molopyo nga nahinabi mibutyag nga sa wala pa ang landfill diha sila maglaba ug gani diha magkuha og tubig nga panlung-ag. Dako ang ilang pangaliyupo nga unta mahatagan sa solusyon ang ilang problema.

Niini, si Dahino mipasalig sa katawhan nga iyang paningkamotan ang dali nga solosyon sa maong problema. Atong paminawon ang problema sa katawhan ug mangita kita og pamaagi sa pagsulbad niini sa madaling panahon. (APD)