Cellsite towers paboritong gubaon sa mga dautang elemento – Calizo

Si konsehal Romeo Calizo, chairman sa komite sa police, fire and public safety, mibutyag nga target ug paborito pagagubaon sa mga walhong grupo ug dautang elemento ang mga cellsite tower nga gitukod sa Globe Telecom.

Kini ang iyang gipadayag atol sa sesyon sa konseho niadtong Lunes nga gidumala ni bise mayor Kikang Uy.

Matod ni Calizo nga kini ang intelligence information nga nahipos sa kapolisan ug militar human siya mitambong sa mga gihimong panagtigom aron hisgutan ang sitwasyon sa seguridad ingon man kahusay ug kalinaw sa Mindanao ilabina dinhi sa syudad.

Dugang ni Calizo nga rason sa mga walhong grupo nga paborito nila ang cellsite tower sa Globe ilabina kadtong atoa nahimutang sa mga hinterland barangays tungod kay matod pa mandaraya ug aduna silay kasuko sa maong kompanya.

Hinuon, matod sa konsehal nga ang mga cellsite tower dinhi sa syudad dili masabotahe sa mga dautang grupo gumikan kay hugot ang seguridad nga gipatuman sa kapolisan ug militar.

Niini, nanghinaut si Calizo nga mausab nila sa Globe ang ilang sistema aron malikayan ang mulo ug reklamo sa katawhan dili lang dinhi sa syudad kun dili sa kinatibuk-an.

Mahinumduman nga gidapit sa konseho sa sesyon niadtong Lunes ang kadagkuan sa Globe aron pagtubag sa mga reklamo sa katawhan ilabina sa serbisyo niini ngadto sa mga konsumedor. (El Kapitan)