CdeO nakaangkon sa Seal of Good Education Governance

Dako ang pahalipay sa konseho sa syudad ubos ni bise mayor Kikang Uy sa kalampusan nga naangkon sa kagamhanan sa dakbayan sa natad sa edukasyon.

Kini human ang dakbayan napasidunggan sa Seal of Good Education Governance gikan sa Synergeia Foundation agig pag-ila sa gipatumang strategic innovations sa natad sa edukasyon ug pagpatuman sa mga programa alang sa de kalidad nga edukasyon sa mga tinun-an sa publikong tunghaan.

Sa sesyon sa konseho niadtong Lunes, si konsehal Ian Mark Nacaya, majority floor leader, mibutyag nga ang dakbayan sa Cagayan de Oro maoy nakakuha sa unang dapit ug ang ikaduhang dapit naangkon sa Valenzuela City ug wala nay lain pang highly urbanized city nga napasidunggan sa maong kalampusan.

Niini, uban ni bise mayor Kikang Uy, ang konseho mipadangat sa ilang pahalipay kang mayor Oscar Moreno, sa mga sakop sa Local School Board, City Schools Division, komite sa edukasyon ubos ni konsehal Suzette Magtajas-Daba ug tanang ahensya nga nalambigit sa pagpatuman sa mga programa ug proyekto sa natad sa edukasyon sa kalampusan nga naangkon.

Agig ganti sa maong kalampusan, ang Smart Communications ug PLDT migahin og balor P1.5 milyones nga package alang sa education programs.