CdeO midawat tanyag sa Yantai City alang sa Twinning Agreement

Kusganong gidawat sa konseho sa syudad ubos ni bise mayor Kikang Uy ang tanyag sa Yantai City sa probinsya sa Shandong, People’s Republic of China alang sa Sisterhood Relationship o’ Twinning Agreement tali sa dakbayan sa Cagayan de Oro.

Kini human gisagop sa konseho sa sesyon niadtong Lunes nga gidumala ni acting vice mayor Lordan Suan ang resolosyon alang sa maong katuyoan.

Ang maong lakang gitinguha sa pagpalambo sa mutual understanding, goodwill ug panaghigalaay tali sa mga molopyo sa duha ka syudad gawas pa nga magpalig-on usab kini sa mahigalaong pagbinayloay ug kooperasyon sa lain laing bahin sa lokal nga pagdumala sa natad sa ekonomiya, trade, science, teknolohiya, kultura, paugnat sa kusog, edukasyon, panglawas, turismo ug uban pa.

Lakip sa gitinguha mao ang pagseguro sa kalinaw ug kalamboan sa duha ka dakbayan.

Nunot niini, ang konseho naghatag og katungod ni mayor Oscar Moreno pagpirma sa gikinahanglang Twinning Agreement alang sa dakbayan sa Cagayan de Oro.

Sa sulat ni mayor Moreno ngadto ni bise mayor Uy, gibutyag nga moabot dinhi sa dakbayan ang delegasyon gikan sa Yantai City sa umaabot Agusto 18, 2017 ug gilantaw nga mopirma sa maong kasabutan.