Salcedo walay nakitang problema sa Martial Law

Walay nakitang problema sa pagpatuman sa Martial Law dinhi sa pulo sa Mindanao.

Kini ang gipadayag ni konsehal Enrico Salcedo, chairman sa komite sa cooperative, atol sa ilang sinemanang programa sa kahanginan sa miaging semana nga “Ang Konseho Karon, The Mover of Change and City’s Development”.

Matod ni Salcedo nga sa pagpatuman sa Martial Law wala gayud makaapekto sa operasyon sa mga kooperatiba dinhi sa syudad ug gani, nagpadayon man nga normal ang dagan sa mga kooperatiba ug wala pa siyay nadungog nga reklamo gikan sa maong sektor.

Gipasabot ni Salcedo nga magpasalamat pa gani, kay kun ang kahusay ug kalinaw ang maapektohan, madalahig man gayud ang tanan.

Kadto lang mga tawo nga adunay dautang tinguha sa katilingban ang angay mahadlok sa Martial Law apan kadtong mga peace-loving nga tawo dili sila malisang niini. Ako mipahibalo nga sa kasamtangan padayon gihapon ang negosyo sa mga kooperatiba ug gani adunay uban nga buot pa nga ma-extend ang Martial Law alang sa kaayuhan sa tanan, pamahayag ni Salcedo.